Chlyklass: HipHop u Schutte
Mänu: Hey Greis, hesch churz Zyt für es Interview? (Schweiz-Türkei isch 30 Minute alt...)
Greis: Ja, wosch es grad ize mache?!
Mänu: Ja okay, (im Backstage acho…) bisch de du nid so schutte agfrässe?!
Greis: Nei im Gägesatz zu de angere nid so… aber i finge die Idee guet „Hip Hop u Schutte“ als solches z verchoufe. Mir passe süsch immer üses ganze Programm em Fuessbau a dh. aui angere (usserd em Link, em Baze u mir) si aui engagiert ir Alternativ-Liga oder im Firme-Fuessbau. Sowou PVP (Viktoria 78, feat. Chruscht, Phantwo u Prügu) wi o Wurzel 5 (Obschtbärg United, 2 mau Schwizermeischter!) hei es eigets Team ir Auternativ Liga.
Mänu: …u glich heiter no nie e Track über Fuessbau gschribe?!
Greis: Mit Fuessbau begeischtere zur Zyt ja scho d Jungs vo „Luut und Tüütli“ uf ihrem nöie Aubum. Aber i üse Tracks hets immer wider versteckt Aspilige uf Fuessbau zum Bispiu ir „Gangschter Hymne“ verzeut dr Chruscht unger angerem vor Wäutmeischterschaft ’86.
Greis: Ja definitiv. Dr Produzät vom Aubum „PVP“ het bi jedem Track öppis uszsetzä gha u de hei mer gfunge iz schribe mer ä Track wo ihm no dr Räscht git. Mir faue enang die ganzi Zyt iz Wort… es si aues 3 ½ und 7 ½ Konstruktione anstatt de „härkömmleche“ 4er und 8er. Aber dadistisch isch es scho nid und dr Mythos es sig diräkt im Studio enstange stimmt so o nid. Teilwiis isch es für üs scho no luschtig was so i üsi Tegschte ine interpretiert wird. Das si mängisch so Gedankeblitze wo me gar nid cha nahvouzieh u plötzlich gseht dert drinne öpper ä Sinn u fat a drann umezdänke. Däm entgäge steit derfür de wider e Track wi „Klinik“ uf em „nöie“ Chlyklass Aubum „ke summer“. Dr Ablouf und d Zytsprüng wo mer dert beschribe bruche Ufmerksamkeit um se chönne z ordne.
Mänu: Wie isch de „Klinik“ entschtange und wie geits wiiter mit em Greis u der Chlyklass?
Greis: Ja dr Beat zu däm Track isch scho lang im Ofä gsi. I hät eigentlech ä Tegscht über ä herrälosä Samurai wöue drüberschribe, aber wo de ds Aubum isch vor dr Tür gschtange het me gfragt wär das öppis mit däm Beat wet machä u drufabe hei sech dr Baze, dr Serej u ig äs Härz gfasst u hei „Klinik“ gschribe… I darf o verrate das „Klinik 2“ bereits planet isch. Usserdäm wird dr Baze baud es nächschts Aubum bringe („Meitli“) und i mache iz de mau mis Lizenziats-Studium z Züri fertig.
Lautes Geschrei vor der Bühne… Senderos schiesst das 1:0 für die Schweiz.
Mänu: Wär het äch ds Gou gschosse?!
Greis: Äue scho d Schwiiz! ;-)
